kisi ke naam pe nanhe diye jalate hue
ḳhuda ko bhuul ga.e nekiyan kamate hue
vagarna baat hamari samajh se bahar thi
ye ishq ho gaya bas ruThte manate hue
hamari vapsi asan nahin yaqin maano
yahan tak aa.e hain ham kashtiyan jalate hue
unhen aziiz hai jiina jo ji rahe hain yahan
mazaq ban ke ḳhud apna mazaq uḌate hue
bhaḌas dil ki nikali ga.i kuchh aise bhi
dua.en mangi ga.iin chiḳhte chillate hue
main ghir gaya huun yahan par bahut se apnon men
tire liye sabhi kuchh daav par lagate hue
Leave a Reply