juda kya ho ga.e tum se na phir yakja hue ḳhud se
mila vo iḳhtiyar aḳhir ki ham tanha hue ḳhud se
tah-e-ab-e-dil-o-jan motiyon ki tarah rahte hain
jo manzar is jahan-e-ḳhak men paida hue ḳhud se
chhupa lete tiri surat ham apni aankh men dil men
lab-e-goya ke hathon kis liye rusva hue ḳhud se
uḌi vo ḳhak-e-dil surat nazar aati nahin apni
pareshan ho ga.e itne ki bargashta hue ḳhud se
vo jhelen saḳhtiyan jaan par ki dil patthar hua apna
bachaya is qadar ḳhud ko ki be-parva hue ḳhud se
mila vo nuur ankhon ko ki be saaya hue ham bhi
hijab-e-la-makan paaya jo be-parva hue ḳhud se
paḌe the be-ḳhabar kab se ḳhamoshi ke samundar men
hava aisi chali ham zamzama-paira hue ḳhud se
ab is zauq-e-huzuri ke maze kis se bayan kijiye
ham apni ḳhalvaton men kis tarah goya hue ḳhud se
‘nadim’ apne safine ko baha kar le ga.e har-su
jo tufan qulzum-e-jan men mire barpa hue ḳhud se
Leave a Reply