ulti har ek rasm-e-jahan-e-shuur hai
sidhi si ik ghazal mujhe likhni zarur hai
vahdat men e’tibar-e-hudus-o-qidam nahin
tha jo butun men ye vahi to zuhur hai
tarik vahi hai jis ne kiya kal ko ikhtiyar
yaani haris-tar hai vahi jo subur hai
mutlaq yagangi hai to nazdik-o-dur kya
pahuncha hai jo qarib vahi duur duur hai
asl-e-hayat hai yahi kahte hain jis ko maut
jiine ki aarzu hai to marna zarur hai
iqrar-e-bandagi hai khudai ka iddaa
ijz-o-niyaz kya hai kamal-e-ghurur hai
ummid kijiye agar ummid kuchh nahin
gham khaiye bahut jo khayal-e-surur hai
zulf-e-siyah se rukh-e-taban ka husn hai
kahte ho jis ko dev haqiqat men huur hai
be-maasiyat khazana-e-rahmat hai raegan
sach puchhiye to jurm na karna qusur hai
izhar-e-jan-e-pak hai jism-e-kasif se
be-pardagi hijab hai zulmat hi nuur hai
bilittifaq hasti-e-vahmi hai niyyati
hushiyar hai jo nashsha-e-ghaflat men chuur hai
aala tha jis ka rutba vo asfal men hai asiir
saff-e-naal moqif-e-sadrussudur hai
hai raah ki talash to kar gumrahi talab
aaqil vahi hai aql men jis ki futur hai
bedari-e-vajud hai khvab-e-adam men gharq
lab band ho gae yahi shor-e-nushur hai
har chand shaghl-e-sher nahin aj-kal zarur
nazrana piir ji ke liye kuchh zarur hai
Leave a Reply