shab ko naala jo mira ta-ba-falak jaata hai
sub.h ko mahr ke parde men chamak jaata hai
apna paimana-e-dil hai mai-e-gham se labrez
buund se bada-e-ishrat ki chhalak jaata hai
kamar-e-yar ki likhta huun nazakat jis dam
ḳhama sau martaba kaghaz pe lachak jaata hai
yaad aati hai kabhi sohbat-e-ahbab agar
ek sho.ala hai ki siine men bhaḌak jaata hai
chandni chhupti hai takyon ke tale a.ankhon men ḳhvab
sone men un ka dupaTTa jo sarak jaata hai
vasl ke zikr pe kahte hain bigaḌ kar dekho
aisi baton se kaleja mira pak jaata hai
dil liya hai to ḳhuda ke liye kah do sahab
muskurate ho tumhin par mira shak jaata hai
pyaar karne ko jo baḌhta huun to kahte hain haTo
nashshe men aa ke koi aisa bahak jaata hai
saqiya jaam pila siiḳh se utra hai kabab
der achchhi nahin ab lutf-e-gazak jaata hai
lab-e-ḳhandan se na den kis liye qatil ko dua
roz zaḳhmon pe namak aa ke chhiḌak jaata hai
shefta shahid-e-ra.ana-e-suḳhan ka huun ‘habib’
na.e andaz pe dil mera phaḌak jaata hai
Leave a Reply