ghalat sab dalilen ghalat sab havale
andhere andhere ujale ujale
mire haal par phabtiyan kasne vaale
mabada tujhe phunk den mere naale
hamen jan-o-dil se vo apna bana le
magar ham kahan aisi taqdir vaale
mujhe va.az par va.az farmane vaale
agar koi teri bhi ninden chura le
hazaron the duniya men iḳhlas vaale
magar gardish-e-vaqt ne piis Daale
rahe zindagi men baja sa.i-e-paiham
muqaddar ka likkha magar kaun Taale
mohabbat pe tera ye ehsan hoga
mohabbat men ji se guzar jaane vaale
idhar to hai mahki faza-e-mohabbat
udhar zehn par chand yadon ke jaale
haqiqat hamesha haqiqat rahegi
haqiqat pe parde koi laakh Daale
mohabbat ki nairangiyan tauba tauba
kahin raten raushan kahin din bhi kaale
koi dam ke mehman hain ai zindagi ham
jahan tak tujhe raas aana hai aa le
agar meri hasti khaTakti hai tujh ko
to le Duub jaata huun ai naḳhuda le
kisi jan-e-jan ki amanat hain ‘asi’
ye ashkon ke tufan ye aahen ye naale
Leave a Reply