na betabi na ashufta-sari hai
hamari zindagi kya zindagi hai
fareb-e-arzu kha.en to kyuun kar
taghaful hai na begana-vashi hai
farogh-e-ishq hai mahrumiyon se
vafa-keshi ba-qadr-e-na-rasi hai
mire qasr-e-tamanna ki nigahban
nigah-e-naz ki beganagi hai
mohabbat ke siva jaada na manzil
mohabbat ke siva sab gumrahi hai
mohabbat men shikayat kya gila kya
mohabbat bandagi hai bandagi hai
ḳhuda bar-haq magar is ko karen kya
buton men sad-fusun-e-dilbari hai
mujhe nafrat nahin jannat se lekin
gunahon men ajab ik dilkashi hai
na do hur-o-mai-o-kausar ke ta.ane
ki zahid bhi to aḳhir aadmi hai
Leave a Reply