poet

Dekho To Zara Ghazab Khuda Ka

dekho to zara ghazab khuda ka

zalim ne mujhi ko pahle taaka

allah ata kare qanaat

nuskha vajib-ul-ada ka

dil deta huun muft aur koi

pursan nahin naqd-e-narava ka

vaan mujh pe jafaen ho rahi hain

yaan vird hai lafz-e-marhaba ka

aana ho to nazaa men huun aao

ye vaqt nahin hai iltava ka

ab aae ho ban ke tum masiha

jab vaqt guzar chuka dava ka

daman men ravan hain ashk-e-gulgun

mahzar hai ye khun-e-muddaa ka

laaya to hai un ko jazb-e-ulfat

aaya to hai dhyan be-nava ka

main ho hi chuka tha zinda dargor

tum aa gae shukr hai khuda ka

duniya se guzar chuke to ‘parvin’

jhagda na raha fana baqa ka

More Poems

Leave a Comment