tabiat jabriya taskin se ghabrai jaati hai
hansun kaise hansi kam-bakht tu murjhai jaati hai
bahut chamka raha huun khal-o-khat ko sai-e-rangin se
magar pazhmurdagi si khal-o-khat par chhai jaati hai
umidon ki tajalli khuub barsi shisha-e-dil par
magar jo gard thi tah men vo ab tak paai jaati hai
javani chhedti hai laakh khvabida tamanna ko
tamanna hai ki us ko niind hi si aai jaati hai
mohabbat ki nigun-sari se dil Duuba sa rahta hai
mohabbat dil ki izmehlal se sharmai jaati hai
faza ka sog utra aa raha hai zarf-e-hasti men
nigah-e-shauq ruh-e-arzu kajlai jaati hai
ye rang-e-mai nahin saaqi jhalak hai khun-shuda dil ki
jo ik dhundli si surkhi ankhdiyon men paai jaati hai
mire mutrib na de lillah mujh ko davat-e-naghma
kahin saz-e-ghulami par ghazal bhi gaai jaati hai