Raqs-E-Shabab-O-Rang-E-Bahaaran Nazar Mein Hai

raqs-e-shabāb-o-rañg-e-bahārāñ nazar meñ hai

ye tum nazar meñ ho ki gulistāñ nazar meñ hai

ik raushnī se ālam-e-dil jagmagā uThā

vo haiñ ki āftāb-e-daraḳhshāñ nazar meñ hai

ahl-e-junūñ se kījiye ab chāk-e-dil kī baat

dāman nazar meñ hai na garebāñ nazar meñ hai

un ke karam se baḌhne lage dil ke hausle

andāz-e-iltifāt-e-farāvāñ nazar meñ hai

sau husn le ke aa.ī hai duniyā-e-ārzū

ārā.ish-e-hayāt kā sāmāñ nazar meñ hai

baḌhtī hī jā rahī haiñ mirī be-qarāriyāñ

jab se kisī kī zulf-e-pareshāñ nazar meñ hai

nazzāra-e-jamāl kiye der ho chukī

ab tak faroġh-e-bazm-e-hasīnāñ nazar meñ hai

halqa banā ke naach rahī haiñ tajalliyāñ

kis mah-jabīñ kā chehra-e-tābāñ nazar meñ hai

shāyad usī ke dam se hai qaa.em ummīd-e-zīst

ik jāñ-faroz sham-e-farozāñ nazar meñ hai

ham bhī nigāh-e-dost se nā-āshnā nahīñ

har inqilāb-e-gardish-e-daurāñ nazar meñ hai

‘muztar’ ko apne baḳht-e-rasā par hai aaj naaz

āqā-‘hasan’ kī bazm-e-gul-afshāñ nazar meñ hai

Leave a Comment