Hakeem Manzoor
be-sud ek silsila-e-imtihan na khol
sab dekh dekhta hi chala ja zaban na khol
andar ka hi na ho zara bahar bhi dekh le
dil ḳhuun hai to aankh pe ḳhunin saman na khol
ik gard chha.egi tire momi dimagh par
thamne de andhiyon ko abhi khiḌkiyan na khol
chhup ja.ega kahan tire hisse ka aftab
ai saya-gard sar pe koi sa.eban na khol
imkan ho to kar le hava se musalahat
be-fa.eda hai varna koi badban na khol
un se yaqin ki daulat-e-nayab maang tu
ankhon pe apni koi fusun aur guman na khol
‘manzur’ harf harf qalam ka hisab de
lekin fuzul daftar-e-sud-o-ziyan na khol
Leave a Reply