na aap aa.e na bedad-e-intizar ga.i
ye raat phir miri ankhon se aaj haar ga.i
liye hue koi afsana-e-bahar ga.i
saba chaman se bahut aaj sogvar ga.i
hui jo sub.h to ashkon se jagmaga uTThi
jo aa.i shaam to yadon se mushk-bar ga.i
isi nigah ne maara alam-paraston ko
vahi nigah miri zindagi sanvar ga.i
zamin-e-ku-e-malamat bhi ḳhair raah men thi
kahan kahan liye mauj-e-ḳhiram-e-yar ga.i
Leave a Reply