Mohammad Ali Jauhar
daur-e-hayat aa.ega qatil qaza ke ba.ad
hai ibtida hamari tiri intiha ke ba.ad
jiina vo kya ki dil men na ho teri aarzu
baaqi hai maut hi dil-e-be-mudda.a ke ba.ad
tujh se muqable ki kise taab hai vale
mera lahu bhi ḳhuub hai teri hina ke ba.ad
ik shahr-e-arzu pe bhi hona paḌa ḳhajil
hal-mimmazid kahti hai rahmat dua ke ba.ad
lazzat hanuz ma.ida-e-ishq men nahin
aata hai lutf-e-jurm-e-tamanna saza ke ba.ad
qatl-e-husain asl men marg-e-yazid hai
islam zinda hota hai har karbala ke ba.ad
ghairon pe lutf ham se alag haif hai agar
ye be-hijabiyan bhi hon uzr-e-haya ke ba.ad
mumkin hai naala jabr se ruk bhi sake agar
ham par to hai vafa ka taqaza jafa ke ba.ad
hai kis ke bal pe hazrat-e-‘jauhar’ ye ru-kashi
DhunDenge aap kis ka sahara ḳhuda ke ba.ad
Leave a Reply