dekha idhar kisi ne udhar main ne aah ki
taḌpa rahi hai qalb ko bijli nigah ki
ban aa.e phir to hashr men har uzr-ḳhvah ki
do apne haath se jo saza tum gunah ki
ab main yunhi lahad men bhi badlunga karvaTen
mera to dam nikalta tha kyon tum ne aah ki
samjhe na bachpane se ki kis par paḌega tiir
a.ina dekhne men bhi tirchhi nigah ki
ik aur bhi rafiq mira chhuTne ko hai
hathon se dil pakaḌ liya jab main ne aah ki
vo aur ruḳh pe zulf ko bikhra.e aa.e hain
taqdir dekhiye mire roz-e-siyah ki
main mar gaya tha ḳhanda-e-zaḳhm-e-jigar se bhi
zalim hansi men jaan ga.i be-gunah ki
kuchh aap ka gila tha na shikva adu ka tha
sharma ke kyon huzur ne nichi nigah ki
ankhon hi men rahega ye ‘safdar’ ka ḳhuun hai
tum aa.ine men dekho to surḳhi nigah ki
Leave a Reply