Allahabad Se

Asrarul Haq Majaz

allahabad men har-su hain charche

ki dilli ka sharabi aa gaya hai

ba-sad avargi ya sad tabahi

ba-sad khana-kharabi aa gaya hai

gulabi laao chhalkao lundhao

ki shaida-e-gulabi aa gaya hai

nigahon men khumar-e-bada le kar

nigahon ka sharabi aa gaya hai

vo sarkash rahzan-e-aivan-e-khuban

ba-azm-e-baryabi aa gaya hai

vo rusva-e-jahan nakam-e-dauran

ba-zoam-e-kamyabi aa gaya hai

butan-e-naz-farma se ye kah do

ki ik tark-e-shahabi aa gaya hai

nava-sanjan-e-sangam ko bata do

harif-e-faryabi aa gaya hai

yahan ke shahr yaron ko khabar do

ki mard-e-inqilabi aa gaya hai