Afroz Rizvi
sahil se utha hai na samundar se utha hai
jo shor miri zaat ke andar se utha hai
dariya-e-mohabbat ke kinare kabhi koi
duuba hai jo ik baar muqaddar se utha hai
vo aae to is khvab ko taabir milegi
jo khvab-e-jazira mire sagar se utha hai
main apne rag-o-pai men use dhund rahi huun
jo shakhs abhi mere barabar se utha hai
raqsan hai miri aankh men ehsas ki manind
manzar jo tiri aankh ke manzar se utha hai
phulon ko tire rang ne bakhshi hai kahani
khushbu ka fasana tire paikar se utha hai
is shahr-e-mohabbat men vo rukta hi nahin hai
jo shor tire pyaar ke mehvar se utha hai
ye us ka ravayya ye ana ye lab-o-lahja
in sab ke sabab amn-o-sukun ghar se utha hai
mehr-o-mah-o-anjum men use dhundne vaalo
ye saara jahan khaak ke paikar se utha hai
rahta hai miri aankh men kajal ki tarah se
jo duur tamannaon ke tevar se utha hai
main dar se tire uth ke isi soch men gum huun
kya koi khushi se bhi tire dar se utha hai
jo us ki nazar se kabhi ‘afroz’ utha tha
is baar vo mahshar mire andar se utha hai
Leave a Reply