ma.asum dil ki hasraten lafzon men Dhaal kar
rakhe hain ham ne dhuup men jugnu nikal kar
hai shiddat-e-talab ka mire alamiya yahi
rakh de na meri pyaas samundar ubaal kar
chalti nahin mohabbaton men jald-baziyan
hote nahin ye faisle sikke uchhal kar
va.adon ke jo khilaune thama kar gaya tha tu
main ne bhi rakh diye hain kahin par sambhal kar
phir yuun hua ki sabz ho uTha vo regzar
nikle jab un ke haath men ham haath Daal kar
tujh se jirah karunga magar shart hai yahi
jis ka javab tu ho mujhe vo saval kar
ik naznin ka dil hua hai gum-shuda kahin
aur ham khaḌe hain samne jeben nikal kar
Leave a Reply