is baagh men vo sang ke qabil kaha na jaae
jab tak kisi samar ko mira dil kaha na jaae
shakhon pe nok-e-tegh se kya kya khile hain phuul
andaz-e-lala-kari-e-qatil kaha na jaae
kis ke lahu ke rang hain ye khaar shokh-rang
kya gul katar gai rah-e-manzil kaha na jaae
baran ke muntazir hain samundar pe tishna-lab
ahval-e-mezbani-e-sahil kaha na jaae
mere hi sang-o-khisht se taamir-e-bam-o-dar
mere hi ghar ko shahr men shamil kaha na jaae
zindan khula hai jab se hue hain riha asiir
har gaam hai vo shor-e-salasil kaha na jaae
ham ahl-e-ishq men nahin harf-e-gunah se kam
vo harf-e-shauq jo sar-e-mahfil kaha na jaae
jis haath men hai tegh-e-jafa us ka naam lo
‘majruh’ se to saae ko qatil kaha na jaae
Leave a Reply