Badle Jo Tum to Rasm-E-Tamanna Badal Gai

badle jo tum to rasm-e-tamanna badal ga.i

mahsus ye hua ki ye duniya badal ga.i

insaniyat gavah kuchh aise bhi azm hain

saaye men jin ke qismat-e-farda badal ga.i

mere junun-e-shauq men kuchh aa ga.i kami

ya tere iltifat ki duniya badal ga.i

ab vaqt-e-ehtiyat hai bar-jur.at-e-nigah

rindi ki riit kaisi ḳhudaya badal ga.i

badle subu na jaam na adab-e-mai-kada

haan mai-kashon ke shauq ki sahba badal ga.i

bikhre hue hain jalve har ik samt aaj bhi

lekin vo arzu-e-tamasha badal ga.i

tere karam se mera jahan tha iram iram

badli tiri nigah to duniya badal ga.i