hamesha duur rah kar bhi hamesha paas hota hai
mohabbat men koi ik shaḳhs kitna ḳhaas hota hai
kisi se dil hi dil men ruThna phir ḳhud hi man jaana
guman is par ki shayad us ko bhi ehsas hota hai
kisi ke saath rahna aur vo bhi ajnabi ban kar
kisi ko kya pata kitna baḌa ban-bas hota hai
bikharta jaata hai har su mahakta mushk-bu lahja
ḳhuda malum kab tak bar-sar-e-qirtas hota hai
suna hai log is sahra men bhi sairab hote hain
vahi sahra jo shayad aap apni pyaas hota hai
ye ham hi hain jo aa jaate hain baton men zamane ki
zamane bhar ki baton par kise vishvas hota hai
ye masti hai junun-e-ishq ki taari hai jo mujh par
ye kis ne kah diya har shaḳhs hi raqqas hota hai
vo ra.ana.i hi ra.ana.i hai zeba us ko yakta.i
ki jis ka zikr misl-e-sura-e-iḳhlas hota hai
ye kaisi marg-asa chup lagi hai aj-kal ‘sima’
suna tha dard ka lahja baḌa hassas hota hai
Leave a Reply