kiya hai dil ne begana jahan-e-murgh-o-mahi se
hamen jagir-e-azadi mili darbar-e-shahi se
khila hai ghuncha-e-hairat hava-e-gah-gahi se
hue majzub rafta rafta us ki kam-nigahi se
tiri duniya men ai dil ham bhi ik goshe men rahte hain
hamen bhi kuchh ummiden hain tiri alam-panahi se
reaya men shahanshah-e-junun ki ham bhi dakhil hain
hamen bhi kuchh na kuchh nisbat to hai zill-e-ilahi se
hue hain bas-ki baiat us nazar ke khanvade men
faqiri se taalluq hai na matlab badshahi se
kiya hai us nazar ne sarfaraz ahl-e-mohabbat ko
kisi ko taj-dari se kisi ko be-kulahi se
kahan vo khanuman-barbadi-e-ishq aur kahan ye ham
phira karte hain yunhi dar-ba-dar vaahi tabahi se
Leave a Reply