Bas Ek sans Liya Khul Ke laKHt-laKHt Hua

bas ek saañs liyā khul ke laḳht-laḳht huā

ki zindagī na huī kāñch kā daraḳht huā

bahut zahīn bhī honā vabāl-e-jāñ hai yahāñ

hamāre saath har ik imtihān saḳht huā

jahāñ pe mujh ko halīmī se kaam lenā thā

usī maqām pe lahja mirā karaḳht huā

na maiñ kisī ke liye zād-e-vasl ban paayā

na hijratoñ meñ mirā koī sāz-e-raḳht huā

‘talab’ havāoñ ke siine pe saañp loT gayā

phir ek nanhā sā paudā ghanā daraḳht huā

Leave a Comment