fasil-e-zat se bahar bhi dekhna hai mujhe
shikast-e-ḳhvab ka manzar bhi dekhna hai mujhe
abhi to main ne faqat barishon ko jhela hai
ab is ke ba.ad samundar bhi dekhna hai mujhe
bana raha huun abhi ghar ko a.ina-ḳhana
phir apne haath men patthar bhi dekhna hai mujhe
sipah-e-kar-e-jahan se nimaT chuka huun magar
tumhari yaad ka lashkar bhi dekhna hai mujhe
abhi to gham ko suḳhan karna sahal hai ‘arif’
maqam-e-ijz-e-suḳhnavar bhi dekhna hai mujhe
Leave a Reply