na puchh dekh ke kitna malal hota hai
jo ḳhvab dekhne valon ka haal hota hai
labon pe mohr-e-ḳhamoshi lagai jaati hai
aur is ke baad hamin se saval hota hai
jab aai sham-s-masafat to phir ye raaz khula
zara si der uruuj o zaval hota hai
har ek shaḳhs ki apni hi ek duniya hai
kahan kisi ko kisi ka ḳhayal hota hai
har ek auj-e-mohabbat pe aa nahin sakta
kisi kisi men hi aisa kamal hota hai
ruki hui huun ik aaise saval par ‘shabnam’
javab jis ka hamesha muhal hota hai