‘azar’ raha hai tesha mire ḳhandan men
paikar dikha.i dete hain mujh ko chaTan men
sab apne apne taaq men tharra ke rah ga.e
kuchh to kaha hava ne charaghon ke kaan men
main apni justuju men yahan tak pahunch gaya
ab aa.ina hi rah gaya hai darmiyan men
manzar bhaTak rahe the dar-o-bam ke qarib
main so raha tha ḳhvab ke pichhle makan men
lazzat mili hai mujh ko aziyyat men is liye
ehsas khinchna tha badan ki kaman men
nikli nahin hai dil se mire bad-dua kabhi
rakkhe ḳhuda adu ko bhi apni amaan men
‘azar’ usi ko log na kahte hon aftab
ik daagh sa chamakta hai jo asman men
Leave a Reply