Akbar Hyderabadi
bas ik tasalsul-e-takrar-e-qurb-o-duri tha
visal o hijr ka har marhala uburi tha
miri shikast bhi thi meri zaat se mansub
ki meri fikr ka har faisla shu.uri tha
thi jiiti jagti duniya miri mohabbat ki
na ḳhvab ka sa vo aalam ki la-shu.uri tha
ta.alluqat men aisa bhi ek moḌ aaya
ki qurbaton pe bhi dil ko guman-e-duri tha
rivayaton se kinara-kashi bhi lazim thi
aur ehtiram-e-rivayat bhi zaruri tha
mashini daur ke azar se hua sabit
ki aadmi ka malal aadmi se duuri tha
khula hai kab koi jauhar hijab men ‘akbar’
guhar ke baab men tark-e-sadaf zaruri tha
Leave a Reply