Ateeq Anzar
guzishta raat koi chand ghar men utra tha
vo ek ḳhvab tha ya bas nazar ka dhoka tha
sitare os mire saath sub.h tak ro.e
magar vo shaḳhs to patthar ka jaise tursha tha
bichhaḌte vaqt ana darmiyan thi varna
manana donon ne ik dusre ko chaha tha
qarib aa ke bhi ḳhvabon ki kho ga.iin kirnen
ki mujh se aage mira bad-nasib saaya tha
gila nahin hai jo us ne mujhe na pahchana
lahu-luhan miri zindagi ka chehra tha
nigal saka na shab-e-gham ka azhdaha mujh ko
ufuq pe vaqt-e-sahar aftab ubhra tha
hasin chand ke chehre pe paḌ ga.e dhabbe
ki mere dil ke andhere se ye bhi guzra tha
Leave a Reply