dil men rakh zaḳhm-e-nava raah men kaam aa.ega
dasht-e-be-samt men ik hu ka maqam aa.ega
is tarah paḌhta huun bahte hue dariya ki kitab
saf.ha-e-ab par ik aks-e-payam aa.ega
qarya-e-jan men the yadon ke shanasa chehre
ajnabi shahr men kis kis ka salam aa.ega
maslahat-kesh to gul-ha-e-sata.ish se lade
sach ke hathon men vahi zahr ka jaam aa.ega
raqs-e-raftar se kya raund chala phulon ko
aag par chal ki tujhe lutf-e-ḳhiram aa.ega
ḳhanjar-e-zahr-e-vafa dil men chhupa.e kab se
muntazir huun ki idhar vo sar-e-sham aa.ega
dida-e-dil se ‘zafar’ ḳhvab bhi chhin ja.enge
vaqt kahta hai ki ab aisa nizam aa.ega
Leave a Reply