Azhar Ghauri
vahi dilon ko shikast karna vahi saval-o-javab karna
kahan se sikha hai tu ne naseh qadam qadam ehtisab karna
vo apne moti baras baras kar na is tarah ra.egan karegi
kabhi na us chashm-e-nilgun se umiid misl-e-sahab karna
jahan bhi mil jaa.e dekh lena vahi hai jan-e-vafa ki surat
vahi nigahen jhuka.e rakhna haya se chehra gulab karna
bahar-e-ḳhun-e-jigar pila kar jinhonne tujh ko shabab baḳhsha
ye kya ghazab hai ki fasl-e-gul men unhin ko ḳhana-ḳharab karna
ye farz saunpa hai baghbanon ko raat sayyad ne chaman ke
ki loriyan de ke kal anadil ko aur bhi mahv-e-ḳhvab karna
kabhi ye socha bhi mere yaaro ki is men aḳhir hai fa.eda kya
jo chand lamhe hain zindagi ke unhin ko nazr-e-azab karna
kisi tarah bhi na aane paa.e koi jhalak sha.iri men ‘az.har’
har ik ghazal ḳhvah apne dil men usi ke naam intisab karna
Leave a Reply