tark-e-lazzat pe maa.il jo ba-zahir hai mizaj
aaj to bagula-bhagat jaise bane hain mahraj
husn-e-maghrur o siyah-fam ka kaise ho ilaaj
shakl-o-surat to chuḌelon ki hai pariyon ke mizaj
chhoḌ aa.e haram-e-pak men jins-e-iman
laad kar la na sake jab ki vatan tak hujjaj
aise bhi bani-e-be-dad hain kuchh duniya men
falak-e-pir bhi deta hai jinhen jhuk ke ḳhiraj
husn ki jitni zamin hoti hai na-qabil-e-kasht
ishq paida kiya karta hai sada sab men anaaj
sab kuchh allah ne de rakkha hai mal-o-zar-o-sim
hain magar ahl-e-duval aql-o-ḳhirad ke muhtaj
is ke aa.iin nahin ab jo amal ke qabil
to ise kar do retire ki purana hai samaj
jab kabhi log taraqqi ki taraf baḌhte hain
Taang uḌa dete hain kambaḳht yahi rasm-o-rivaj
haa.e kya puchhte ho murda dilon ka ahval
miyan zinda hain magar beva hain un ki azvaj
na-ḳhuda.i kiya karta hai talatum ḳhud hi
kheti hain aap hi aa kar miri kashti amvaj
chain se shaiḳh-e-haram umr basar karte hain
rupaya bank men hai milta hai mahana byaaj
kaag uḌ uḌ ke ye botal ke sada dete hain
nashsha-bandi ki suna hai koi mēting hai aaj
ab tu jo chahe kare ishq-e-vatan men ai ‘shauq’
husn kuchh bol nahin sakta hai de kar sauraj
Leave a Reply