jab har nazar ho ḳhud hi tajalli-numa-e-gham
phir aadmi chhupa.e to kaise chhupa.e gham
us vaqt tak mili na mujhe lazzat-e-hayat
jab tak raha zamane men na-ashna-e-gham
meri nigah-e-shauq hi gham ka sabab nahin
un ki nigah-e-naz bhi hai rahnuma-e-gham
sauda-e-ishq dard-e-mohabbat jafa-e-dost
ham ne ḳhushi ke vaste kya kya uTha.e gham
shayad ye hai karishma fareb-e-nashat ka
ghabra ke aa ga.i hai labon par dua-e-gham
‘farhat’ ki har hansi men hain aansu chhupe hue
us ki ḳhushi bhi oḌhe hue hai rida-e-gham
Leave a Reply