fasl-e-gul dekh ke afzun hui vahshat apni
le chale dekhiye kis ja mujhe qismat apni
go mujhe zoaf ne majbur kiya tha lekin
manzil-e-ishq men kaam aa gai himmat apni
tu hi insaf se kah de ki ye parda kya hai
kyuun chhupata hai dikha kar mujhe surat apni
puchhte kya ho fida jaan kiya kyuun main ne
ishq apna hai dil apna hai tabiat apni
mahv-e-nazzara hain ham to kisi janib chhup kar
aur vo aine men dekha kare surat apni
rahat-o-ranj ka ghairon pe asar kya hoga
ranj apna hai alam apna masarrat apni
jaan jaae to chali jaae magar ai qatil
tere kuche hi men ho jaae shahadat apni
sar men sauda-e-havas aur takabbur na rahe
chashm-e-batin se agar dekhe haqiqat apni
tar-e-malbus-e-khudi kyuun rahen baaqi mere
panja-e-dast-e-junun apna hai vahshat apni
mar hi jaun main agar hijr men naale na karun
ah-o-zari se nikal jaati hai kulfat apni
dil use de ke ‘jamila’ main abas kyuun rota
us ne rakhne ko mujhe di thi amanat apni