bevafa ke va.ade par e.atibar karte hain
vo na aa.ega phir bhi intizar karte hain
log ab mohabbat men karobar karte hain
dil bacha ke rakhte hain jaan shikar karte hain
ishraten jahan-bhar ki bas unhin ka hissa hai
jo ravish zamane ki iḳhtiyar karte hain
shaḳhsiyat men jhanken to aur hi tamasha hai
baten jo nasihat ki be-shumar karte hain
apne dam-qadam se to dasht bhi gulistan hai
ham jo ḳharzaron ko lala-zar karte hain
jaan se guzarte hain be-ḳhudi men ahl-e-dil
vo jo chashm-e-pur-fan ko zulfiqar karte hain
hon shagufe shaḳhon ke ya laven charaghon ki
sab hava ke daman par inhisar karte hain
ham kahan ke daana hain kis hunar men yakta hain
log phir bhi jaane kyuun ham se pyaar karte hain
jis jagah pe ḳhadsha ho pair ke phisalne ka
ham qadam vahin ‘ejaz’ ustuvar karte hain
Leave a Reply