Ram

Allama Iqbal

labrez hai sharab-e-haqiqat se jam-e-hind

sab falsafi hain khitta-e-maghrib ke ram-e-hind

ye hindiyon ki fikr-e-falak-ras ka hai asar

rifat men asman se bhi uncha hai bam-e-hind

is des men hue hain hazaron malak-sarisht

mashhur jin ke dam se hai duniya men nam-e-hind

hai raam ke vajud pe hindostan ko naaz

ahl-e-nazar samajhte hain is ko imam-e-hind

ejaaz is charagh-e-hidayat ka hai yahi

raushan-tar-az-sahar hai zamane men sham-e-hind

talvar ka dhani tha shujaat men fard tha

pakizgi men josh-e-mohabbat men fard tha