Abbas Tabish
bachpan ka daur ahd-e-javani men kho gaya
ye amr-e-vaqia bhi kahani men kho gaya
lahron men koi naqsha kahan paedar hai
suraj ke baad chand bhi paani men kho gaya
ankhon tak aa saki na kabhi ansuon ki lahr
ye qafila bhi naql-e-makani men kho gaya
ab bastiyan hain kis ke taaqub men rat-din
dariya to aap apni ravani men kho gaya
‘tabish’ ka kya kahen ki vo zohra-gudaz shakhs
atish-fishan ka phuul tha paani men kho gaya
Leave a Reply