ye lagta hai ab bhi kahin kuchh bacha hai
tumhara diya zaḳhm ab tak hara hai
kaho kaun si shakl dekhoge ab tum
ye chehra to ik avran se Dhaka hai
laga hai zamana ibadat men jis ki
vo rahta kahan hai tumhen kuchh pata hai
gunahon se tauba karo vaqt rahte
vagarna to dozaḳh ka rasta khula hai
mohabbat mohabbat mohabbat mohabbat
amaan yaar chhoḌo ye halka nasha hai
bhala.i karo to mile hai bura.i
ye qissa miri zindagi se juḌa hai
ghalat-fahmiyan ‘mit’ rakkho na dil men
vahi sach nahin jitna tum ne suna hai
Leave a Reply