ismail-merathi

Nahin Malum Kya Wajib Hai Kya Farz

nahin malum kya vajib hai kya farz

mire mazhab men hai teri raza farz

shuur-e-hasti-e-mauhum hai kufr

fana baad-e-fana baad-e-fana farz

nahin agah mast-e-bada-e-shauq

kahan sunnat kidhar vajib kuja farz

reh-e-taslim men az-ru-e-fatva

dua vajib pa tark-e-muddaa farz

na chhute kufr men bhi vaz-e-iman

ki har halat men hai yad-e-khuda farz

nahin dekha kisi ne husn-e-mastur

ba-qadr-e-fahm lekin kar liya farz

na manunga na manunga kabhi main

mujhe karte hain kyuun us se juda farz

na kholunga na kholunga zaban ko

ki hai ikhfa-e-raz-e-dilruba farz

bala se koi maane ya na maane

chalo ham kar chuke apna ada farz

More Poems

Leave a Comment