nazakat hai na ḳhushbu aur na koi dilkashi hi hai
gulon ke saath phir bhi ḳhaar ko rab ne jagah di hai
kisi ki yaad chupke se chali aati hai jab dil men
kabhi ghunghru se bajte hain kabhi talvar chalti hai
vahi karte hain da.ava aag nafrat ki bujhane ka
ki jin ke haath men jalti hui machis ki tiili hai
haTo karne do apne man ki bhi in naujavanon ko
ye in ka daur hai in ka samay hai in ki baari hai
ghuTan taḌpan udasi ashk rusva.i akela-pan
baghair in ke adhuri ishq ki har ik kahani hai
kabhi bachchon ko mil kar khilkhilate nachte dekha
laga tab zindagi ye ham ne kya se kya bana li hai
utar aa.e hain badal yaad ke ankhon men yuun ‘niraj’
zamin jo kal talak thi ḳhushk ab vo bhigi bhigi hai
Leave a Reply