Dil Jo Murda Ho to Ye Rashk-E-Jinan Kuchh Bhi Nahin

Jafar Raza

dil jo murda ho to ye rashk-e-jinan kuchh bhi nahin

laala ho sabza ho ya ab-e-ravan kuchh bhi nahin

ye dahakte hue ghunche ye sulagte hue dil

har taraf soz-e-darun harf-e-zaban kuchh bhi nahin

pyare daman se juda ho ga.e main ne dekha

hasraten bolin miyan umr-e-ravan kuchh bhi nahin

lafz-o-ma.ani men jo rishta hai vo buniyadi hai

sirf alfaz ka ik sail-e-ravan kuchh bhi nahin

karda-na-karda gunahon men kaTi umr-e-aziz

log kahte hain ziyan varna ziyan kuchh bhi nahin

barish-e-sang ho shishe ki kamin-gahon se

kaise farzane ho shishe ka makan kuchh bhi nahin

ḳhvab se ḳhvab men ik umr giraftar raha

ab khala ḳhvab ba-juz vahm-o-guman kuchh bhi nahin