Chandni Pandey
umr ke lambe safar se tajraba aisa mila
dhuup jab bhi sar pe aai lapata saaya mila
dekhna hai aks mujh ko apna puura hi magar
jab mila vo aaina mujh ko zara tuuta mila
hanste chehron ki kahani janti huun khuub main
jis ko bhi parkha vahi tuuta mila bikhra mila
jal rahe the paanv ik muddat se rahat ke liye
jis taraf bhi main gai tapta hua sahra mila
raat din manga dua jis ham-safar ke vaste
mere jite-ji vo mera marsiya padhta mila
ye safar main ne akele hi kiya hai ‘chandni’
ham-safar mujh ko kahan koi mire jaisa mila
Leave a Reply