Arsh Malsiyani
zaḳhm-e-dil bhi dikha ke dekh liya
bas tumhen aazma ke dekh liya
dagh-e-dil se bhi raushni na mili
ye diya bhi jala ke dekh liya
shikve miTte hain kyunkar aap se aap
samne un ke ja ke dekh liya
muzhda ai hasrat-e-dil-e-pur-shauq
us ne phir muskura ke dekh liya
aabru aur bhi hui paani
ashk-e-hasrat baha ke dekh liya
tark-e-ulfat ke sun liye ilzam
raz-e-dil ko chhupa ke dekh liya
jo na dekha tha aaj tak ham ne
dil ki baton men aa ke dekh liya
koi apna nahin yahan ai ‘arsh’
sab ko apna bana ke dekh liya
Leave a Reply