Poet
na vo ḳhushbu hai gulon men na ḳhalish ḳharon men
ik tire aate hi ḳhaak uḌ ga.i gulzaron men
chashm-o-abru-o-miza yaar ki hain darpai jaan
ek dil ghir gaya hai itne dil-azaron men
maraz-e-hijr se bachta nahin be-daru-e-vasl
hai ye azar baḌa ishq ke azaron men
tujh ko zebinda hai kya sadgi aur rangini
ek trahdar hai tu laakh tarah-daron men
phir ga.i meri nazar men mizha-o-chashm tiri
dida-e-abla dekha jo ghira ḳharon men
be-gunahon ki hain abru-e-siyah tishna-ḳhun
na.e jauhar nazar aa.e tiri talvaron men
ashiq-e-ḳhal-e-malih apna samajh kar bole
ki hamare ye qadimi hain namak-ḳhvaron men
navak-e-ah ne paida ki rah-e-amad-o-raft
saikḌon ban ga.e dar yaar ki divaron men
yusuf-e-dil ko hasinon se siva samjhe aziiz
pher deta ye DhinDhora koi bazaron men
naam rakhne ki bhi uTh jaa.e use kaifiyyat
dam-bhar aa baiThe jo vaa.iz koi mai-ḳhvaron men
amad-e-fasl-e-bahari ka jo hangama hai
ghul hai tauba-shikani ka tire mai-ḳhvaron men
‘qalaq’ itni nahin har vaqt koi bach karta
aap bhi hazrat-e-dil ke hain taraf-daron men
Leave a Reply