Imdad Imam Asar
apne dar se jo uThate hain hamen
ḳhaak men aap milate hain hamen
hai jo manzur jafa dar-parda
munh vo ghairon men dikhate hain hamen
ghair ko paas biTha rakhte hain
jab kabhi aap bulate hain hamen
garmiyan ghair ko dikhla dikhla
bazm men aap jalate hain hamen
shab-e-furqat men falak ke taare
dagh-e-dil yaad dilate hain hamen
un ke andaz-e-suḳhan hain ma.alum
ghair ko kah ke sunate hain hamen
phir kisi gul pe hua dil maa.il
dagh-e-taza nazar aate hain hamen
chhoḌ den aap ki hamrahi ham
vaah kya raah batate hain hamen
tu hamen raah bata.e jis se
ghair vo raah batate hain hamen
itr-e-gul se nahin jab dil bharta
apna rumal sunghate hain hamen
shab ko afsana-e-dil kah ke ‘asar’
aap rote hain rulate hain hamen
Leave a Reply