baghair yaar gavara nahin kabab sharab
gazak hai daagh mujhe aur khun-e-nab sharab
agar hai shauq-e-taharat sharab pi zahid
tire najasat-e-qalbi ko hogi aab sharab
dimagh ahl-e-kharabat ke moattar hain
kabab nafa-e-mushk-e-khutan gulab sharab
piyun najat samajh ke jo ishq-e-saqi hai
darud padh ke tapaun pae savab sharab
baghair sukr hua hai ye alam-e-sakrat
hamare munh men chuvav ba-jae aab sharab
chaman pe jhuum raha hai siyah masti men
ajab bahar hai barsae jo sahab sharab
shab-e-visal hai anjum khilaen naql mujhe
pilae apne piyale men mahtab sharab
bahut mazammat-e-mai-khvar likh raha hai shaikh
khuda kare ki bane jadval-e-kitab sharab
chale bahar ke ayyam saqi-e-gul-ru
mira shabab hai mehman la shitab sharab
koi gazak gazak-e-husn se nahin aala
sharabon men hai mai-e-ishq intikhab sharab
hai nur-e-nashsha ziya-bakhsh dida-e-irfan
dur-e-yagana-e-dil ki hai ab-o-tab sharab
khuda ke ghar men vo barra raha hai ai rindo
jagao shaikh ko chidko ba-ru-e-khvab sharab
na dekhe bughz se manind-e-shapparak zahid
hai apne nuur se ham-jam-e-aftab sharab
nashat-o-aish jahan par na ‘bahr’ lahrana
ki bagh-e-sabz-e-gulistan hai sarab sharab
Leave a Reply