Azhar Naiyyar
main mahal ret ke sahra men banane baiTha
chand alfaz ko maazi ke bhulane baiTha
hadse se hi hua gham ka mudava mere
falsafa sabr ka logon ko paḌhane baiTha
thak ke saa.e men babulon ke sukun jab chaha
us ka har patta mujhe kanTe lagane baiTha
jis ne toḌa sabhi naton sabhi rishton ko mire
umr bhar ka vahi ab qarz chukane baiTha
us ke talḳhab se kab pyaas miri bujh paa.i
ghar samundar ke kinare hi basane baiTha
jism ke baḳhiye jo udhḌe to udhaḌte hi rahe
jaama resham ka pahne ko silane baiTha
log the gird alaav ke magar main ‘nayyar’
jism ki aag ko paani se bujhane baiTha
Leave a Reply