chaman-e-lala ye ulfat tiri dikhlati hai
sainkadon daagh hain aur ek miri chhati hai
garche tuuti bhi hai shirin-sukhani men mumtaz
par tiri baat ki lazzat ko kahan paati hai
badli aa jaati hai is lutf se khurshid pe kam
zulf munh par tire jis aan se khul jaati hai
gul hi tanha na khajil hai rukh-e-rangin se tire
nargis ankhon ke tire samne sharmati hai
main kahan aur tira vasl ye hai bas ai gul
gaah be-gah tiri bu to saba laati hai
raat thodi si hai bas jaane de mil hans kar bol
na-khushi ta-ba-kuja subh hui jaati hai
raushni khana-e-ashiq ki hai tujh se varna
tu na ho to shab-e-mahtab kise bhati hai
sadgi dekh to dil us se kare hai yaari
nagani dekh ke jis zulf ko bal khati hai
mah-rukhan kya hain ki ho aa ke muqabil ‘bedar’
kanpti samne jis shokh ke barq aati hai
Leave a Reply