bhes kya kya na zamane men bana.e ham ne
ek chehre pe ka.i chehre laga.e ham ne
is tamanna men ki is raah se tu guzrega
diip har raah men har raat jala.e ham ne
dil se nikli na ḳharash-e-gham-e-ayyam ki dhuup
tere naḳhun se ka.i chand bana.e ham ne
daman-e-yar ne haq apna jataya na kabhi
ashk umDe bhi to palkon men chhupa.e ham ne
ḳhud hue gharq zamane ko bhi gharqab kiya
ek aansu se vo tufan uTha.e ham ne
tere pahlu se bhi pahunche na tire pahlu tak
fasle qurb ke go laakh ghaTa.e ham ne
chehre katbe sahi katbon ki ibarat pe na ja
abhi lafzon se kahan parde uTha.e ham ne
sher kahne se na mahbub na duniya hi mili
umr-bhar sher kahe sher suna.e ham ne
Leave a Reply