Shamim Jaipuri
ye daur-e-ahl-e-havas hai karam se kaam na le
jafa se kaam le zalim vafa ka naam na le
gila sitam ka nahin mujh ko sirf ḳhauf ye hai
zamana tujh se kahin mera intiqam na le
zamana us ko miri yaad ḳhud dila dega
vo laakh mujh ko bhula de vo mera naam na le
maza to jab hai ki ai sabr-o-zabt-e-ishq ik din
vo ḳhud salam kare jo mira salam na le
na kar zara bhi tavajjoh ḳhata-e-dushman par
ik intiqam hai ye bhi ki intiqam na le
dil-e-tabah jo hona tha vo to ho hi gaya
zamana kuchh bhi kahe tu to un ka naam na le
vo kya nigah jo marhun-e-jam hi rakkhe
vo haath kya hai jo girte huon ko thaam na le
tiri nigah se pi le jo ek baar ai dost
tamam umr vo phir mai-kashi ka naam na le
usi ke dar pe jhuka.e rahenge sar ko ‘shamim’
ye dekhna hai vo kab tak karam se kaam na le
Leave a Reply