Jaur-O-Be-Mehri-E-Ighmaz Pe Kya Rota Hai

Firaq Gorakhpuri

jaur-o-be-mehri-e-ighmaz pe kya rota hai

mehrban bhi koi ho jaega jaldi kya hai

kho diya tum ko to ham puchhte phirte hain yahi

jis ki taqdir bigad jaae vo karta kya hai

dil ka ik kaam jo hota nahin ik muddat se

tum zara haath laga do to hua rakkha hai

nigah-e-shokh men aur dil men hain choten kya kya

aaj tak ham na samajh paae ki jhagda kya hai

ishq se tauba bhi hai husn se shikve bhi hazar

kahiye to hazrat-e-dil aap ka mansha kya hai

zinat-e-dosh tira nama-e-aamal na ho

teri dastar se vaaiz ye latakta kya hai

haan abhi vaqt ka aina dikhae kya kya

dekhte jaao zamana abhi dekha kya hai

na yagane hain na begane tiri mahfil men

na koi ghair yahan hai na koi apna hai

nigah-e-mast ko jumbish na hui go sar-e-bazm

kuchh to is jam-e-laba-lab se abhi chhalka hai

rat-din phirti hai palkon ke jo saae saae

dil mira us nigah-e-naz ka divana hai

ham judai se bhi kuchh kaam to le hi lenge

be-niyazana taalluq hi chhuta achchha hai

un se badh-chadh ke to ai dost hain yaden in ki

naz-o-andaz-o-ada men tiri rakkha kya hai

aisi baton se badalti hai kahin fitrat-e-husn

jaan bhi de de agar koi to kya hota hai

tiri ankhon ko bhi inkar tiri zulf ko bhi

kis ne ye ishq ko divana bana rakkha hai

dil tira jaan tiri aah tiri ashk tire

jo hai ai dost vo tera hai hamara kya hai

dar-e-daulat pe duaen si suni hain main ne

dekhiye aaj faqiron ka kidhar phera hai

tujh ko ho jaenge shaitan ke darshan vaaiz

daal kar munh ko gareban men kabhi dekha hai

ham kahe dete hain chalon men na aao un ki

sarvat-o-jah ke ishvon se bacho dhoka hai

yahi gar aankh men rah jaae to hai chingari

qatra-e-ashk jo bah jaae to ik dariya hai

zulf-e-shab-gun ke siva nargis-e-jadu ke siva

dil ko kuchh aur balaon ne bhi aa ghera hai

lab-e-ejaz ki saugand ye jhankar thi kya

teri khamoshi ke manind abhi kuchh tuuta hai

daar par gaah nazar gaah su-e-shahr-e-nigar

kuchh sunen ham bhi to ai ishq irada kya hai

aa ki ghurbat-kada-e-dahr men ji bahlaen

ai dil us jalva-gah-e-naz men kya rakkha hai

zakhm hi zakhm huun main subh ki manind ‘firaq’

raat bhar hijr ki lazzat se maza luuta hai