Jamegi Kaise Bisat-E-Yaran Ki Shisha O Jam Bujh Gae Hain

jamegi kaise bisat-e-yaran ki shisha o jaam bujh gae hain

sajegi kaise shab-e-nigaran ki dil sar-e-sham bujh gae hain

vo tirgi hai rah-e-butan men charagh-e-rukh hai na sham-e-vada

kiran koi aarzu ki laao ki sab dar-o-bam bujh gae hain

bahut sambhala vafa ka paiman magar vo barsi hai ab ke barkha

har ek iqrar mit gaya hai tamam paigham bujh gae hain

qarib aa ai mah-e-shab-e-gham nazar pe khulta nahin kuchh is dam

ki dil pe kis kis ka naqsh baaqi hai kaun se naam bujh gae hain

bahar ab aa ke kya karegi ki jin se tha jashn-e-rang-o-naghma

vo gul sar-e-shakh jal gae hain vo dil tah-e-dam bujh gae hain