Ahmad Ali Barqi Azmi
laut kar jaise daur-e-shabab aa gaya
aap kya aa gae inqalab aa gaya
is tarah dil ke arman puure hue
nama-bar le ke khat ka javab aa gaya
dekhne ko tarasti thiin ankhen jise
samne vo mire be-hijab aa gaya
gulshan-e-dil pe ik tazgi chha gai
ban ke vo ik mujassam gulab aa gaya
alam-e-khvab men jis ko padhta tha main
ru-e-zeba ki le kar kitab aa gaya
jis ke jaane se tarik thi zindagi
khana-e-dil men ba-ab-o-tab aa gaya
zehn mauf tha ginte ginte jise
aaj ‘barqi’ vo roz-e-hisab aa gaya
Leave a Reply